Bye Bye Looki

Liebe Looki

Vor genau 10 Jahr bisch du zu eus cho. Viel Auge sind gspannt gsi uf dich und gwunderig wie du wohl usgsehsch.

WOW, du häsch eus begeisteret.

homberg_weiden3

Sit mir dich händ, bisch du ei Saison nach der andere eusä treui Begleiter im Training und uf Turnier gsi.

I dene 10 Jahr bisch du Einzelküre, 3er und 2er Küre im Galopp, und 3er Küre im Schritt gloffe. Jede Dunnstig laufsch du S`Gruppetraining und am Samstig lasch du de Nachwuchs uf dim Rugge ume turne.

S`jährlichi Plauschturnier und die jewillige Ferieplauschisätz im Summer sind dini Lieblingsufgabe gsi.

Jedesmal wenn d`Chinde in Stall chömed, bisch du de, wo sin Chopf übers Gländer streckt und wet Streicheleinheite und Gudelis ha. Je meh Chind und je meh Lärm und je meh chribeligi Stimmig um dich ume isch, desto grösser isch dini Rueh. Du häsch das Gjuffel um dich ume immer gliebt und gnosse. Bisch eus mängmal chli es Rätsel gsi, woher du die viele viele Nerve häsch.

So es vielfälltigs Voltigetalent z`verlühre isch en grosse Verlust. Mir Stäfner sind dir unendlich Dankbar für die viele schöne Moment wo du eus gschenkt häsch. Du häsch eus grossi Freud bereitet.

Au bisch du bi dine Riiterine, wo mit viel Freud in Stall cho sind, sehr beliebt gsi, au wänn si mängmal am verzwifflä gsi sind mit dinere stuure Art.

Du häsch e wunderschöni Voltige-Karriere därfe erläbe u bisch en grosse Teil vo eusem Verein. Dhelfti vo eusem ganze Vereins-Bestah häsch du prägt. Das cha keis anders Ross vo eus über sich behaupte.

Du häsch dir dini Voltige-Pensionierig absolut verdient und dis neue Dihei isch en mega schöne Ort wo du dich wirsch wohlfühle. Mir sind froh, dass du gsund und fit zu dine neue Bsitzer chasch zügle u dört glücklich dörfsch alt werde.

Liebe Looki, Danke dass mir dich händ därfe kännelerne. Mir werdet dich vermisse.

 

Du wirsch immer i eusne Herze bliibe.

Unbenannt